محمد أمير يكتب: قصة كومبارس سينما متورط في تهريب آثار مصرية

عارف انتا الممثل اللي في الصورة ده اللي طلع في ادوار ثانوية كدة؟ اللي هوا متعرفش اسمه بس شفته في اكتر من مسلسل وفيلم زي سمير وشهير وبهير مثلا اهو النهاردة بقا اتحكم عليه ب٣٠ سنة سجن وغرامة ٥ ملايين جنية في قضية تهريب ٢٢ الف قطعة اثرية لايطاليا في قضية “الحقيبة الدبلوماسية”، وبالمناسبة ده يبقا اخو يوسف بطرس غالي الوزير السابق الحرامي هوا كمان ..

الاستاذ الممثل بطرس رؤوف بطرس غالي كون عصابة تهريب اثار مع ٣ كمان كل واحد فيهم كان ليه دور، اولهم منقب عن الاثار اسمه احمد مجدي وده اللي بيدور عالاثار في اي حتة ويعملها هدف لجمعها، متحف بقا ولا قصر رئاسي ولا قطعة ارض في الصعيد، المهم انه يشمشم لحد ما يجمع حبة حلوين،

تانيهم كان قنصل ايطالي شرفي سابق في الاقصر اسمه لاديسلاف أوتكر سكاكال وده اللي كانت الحاويات الدبلوماسية بتخرج بأسمه وتروح علي ايطاليا ومبتتفتشش عشان هوا قنصل يعني،

تالتهم كان مدحت شفيق موظف في شركة شحن وده اللي كان بيرص الاثار في الحاويات الدبلوماسية ويخرجها بأسم شركته للمطار تحت اسم المسئول الايطالي،

واخرهم هو الممثل اللي قدامك ده اللي يبقا سليل عائلة بطرس غالي بتاع محاكمة دنشواي واللي كان حلقة الوصل بين الكل والممول اللي بيدفع هنا ويخلص هناك بعلاقاته وفلوس عيلته، الى جانب انه مالك شركة حابي للسياحة وصاحب القنصل الايطالي السابق

طبعا لسة محدش عارف وراهم مين ولا هما كدة لوحدهم، والقضية بقالها سنتين في المحاكم من ٢٠١٨ بعد ما اتظبطت حاوية دبلوماسية في مطار ساليرنو وكانت عبارة عن ٢١٨٥٥ قطعة اثرية متقسمين مابين ٢١٦٦٠ عملة معدنية إضافة إلى ١٩٥ قطعة أثرية منها ١٥١ تمثالا أوشابتى صغيرين من الفاينس و١١ آنية فخارية و٥ أقنعة مومياوات مطليين بالذهب وتابوت خشبى ومركبين صغيرين من الخشب و٢ رأس كانوبى و٣ بلاطات خزفية ملونة تنتمى للعصر الإسلامى، وكلهم تم استعادتهم لمصر بعد كدة.

طبعا القضية مكتملة، وكل المتهمين تم ضبتهم ماعدا القنصل السابق الايطالي اللي هربان ومحدش عارف هما فين، وفيه شهادات زي الخدامة بتاعت بيت بطرس غالي وغيرهم، كمان المضبوطات اللي لقوها في بيت كل واحد فيهم، تخيل كل واحد فيهم مسلك قطع اثرية في دواليب بيتهم + ٤١ قرص ترامادول كانوا في بيت بطرس في الزمالك.

الصورة ليه من جوا الحبس وقت المحاكمة النهاردة، ودي القضية اللي اتقفشت فيها الحمولة دي بس محدش عارف فيه ايه اتهرب قبل كدة، وياما تحت السواهي دواهي علي رأي اجدادنا زمان.