ملاعب
شاب يعلق على أزمة عمرو وردة برسالة مؤثرة عبر “فيسبوك”
علق شاب يُدعى كامل سعد كامل، صاحب الـ22 عاماً، ابن مدينة بيلا، بمحافظة كفر الشيخ، والطالب بالفرقة الخامسة بكلية الطب ـ جامعة كفر الشيخ، على أزمة عمرو وردة، لاعب أتروميتوس اليونانى وخط وسط منتخب مصر، والذى تم استبعاده من مباريات المنتخب الوطنى بعد اتهام فتاة مكسيكية له بالتحرش بها، برسالة مؤثرة عبر صفحته الشخصية على موقع التواصل الاجتماعى “فيسبوك”.
وقال “كامل”، فى تدوينة له عبر “فيس بوك”، “أنت صحيت النهاردة الصبح لقيت كل صفحات الفيس بتتكلم عنك، كل الشباب والبنات بيقولوا اسمك، أنت حديث كل القنوات وكل الجرايد وكل القهاوى والتجمعات من الكبار والصغيرين.. دى حكاية تخوف جدًا حتى لو الكلام اللى هيقولوه ده مدح، لكن للأسف الأحاديث دي كلها ملخصها انك مش محترم ومش متربى ومعندكش لا دين ولا أخلاق ولا دم.. الاسكرينات اللى بتدلل على الكلام ده كلها بتوصلك ف رسايل.. لما فتحت الفيس لقيت كل الاسكرينات دى فى كل حتة.. 99% منها اسكرينات فوتوشوب بس مش هتقدر تتكلم لأن صوتك مش هيبقى مسموع، كل كلمة منك هتضحّك الناس عليك أكتر وهتقتلك أكتر.. كل الصفحات اللى معندهاش حياء ناشرة اسمك فى عنوان فيديو (فلان) الخادش للحياء إيه ده؟ ده اسمي فعلًا.. أنت فعلًا فى الوقت ده هتتشل على السرير، هيبقى نفسك تكون بتحلم، لما بتقوم وبتتأكد انك صاحى هيبقى نفسك تموت، هتفكر فى الانتحار، هتتمنى إن اسمك ده مكانش يبقى موجود فى يوم من الأيام، هتبقى عارف إن لو حد شافك إما هيضربك أو يشتمك أو هيتف فى وشك.. مش هتقدر تنزل تصلى، مش هتقدر تروح الكلية، مش هتقدر تنزل تشترى حاجة من السوبر ماركت.. طيب هتصلى الجمعة ازاى؟”.
وأضاف “كامل”، “مفيش دليل عملى على انك أفضل من الإنسان اللى أنت بتتريق عليه، ربنا فقط هو من يعلم مين منكم فى الجنة ومين فىى النار، احنا مش كويسين، احنا مستورون، وأغلب مشاكلنا بسبب إن التفاهة هى القيمة الكبيرة فى الجتمع، وحب الألش والاستظراف دون التقيد بأى قيود دينية وأخلاقية.. نهزر على أى حاجة وفى أى اتجاه.. دى مشكلتنا فى تريند عمرو وردة وأى تريند تانى، معنديش مانع إن يبقى فى عقوبة أخلاقية لكل إنسان بيظهر منه فعل مُشين، بس المشكلة كلها إننا نحول العقوبة دى لانتقام، تبقى عقوبة مجتمعية إنسانية، نهرس فيها نفسية الإنسان ونقتله كل يوم ألف مرة، وأوعى تحتقر دين أى إنسان وتفتكر انك أنت الطائع وهو العاصى، ده فى حد ذاته سبب لدخول النار”.
وتابع “كامل”، “يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ”، اللهُ جلّت عظمتُه، و”من تتبّع عورة أخيه تتبّع الله عورته، ومن تتبّع الله عورته فضحه ولو في جوف بيته” سيدنا النبى عليه الصلاة والسلام، و”الناس يُعيّرون ولا يغفرون، والله يغفر ولا يُعيّر” ميمون بن مهران، و “نحن قوم مساكين.. لولا ستر الله علينا لافتضحنا” أحمد بن حنبل، و”لو تكرر الذنب 100 مرة، أو 1000 مرة، أو أكثر.. وتاب.. قُبلت توبته وسقطت ذنوبه” النووى”.
وأوضح “كامل”، “الحمد لله إن ربنا مجعلش الجنة والنار بإيد حد، الحمد لله أنه بيغفر للعبد مهما بلغت ذنوبه لو رجع له بجد، يا رب متحاسبناش يوم القيامة قدام حد من خلقك، يا رب محدش يشوف بلاوينا غيرك يوم تُبلى السرائر، واسترنا ومتفضحناش فى الدنيا والآخرة، وارزقنا هدايةً من عندك ثم ثبتنا عليها”.
وحصدت التدوينة مئات الإعجابات، وتفاعل معها المئات من مستخدمى موقع التواصل الاجتماعى “فيسبوك”.
وكان مجلس إدارة اتحاد الكرة برئاسة هانى أبو ريدة، قد قرر استبعاد عمرو وردة لاعب أتروميتوس اليونانى مدى الحياة من جميع المنتخبات المصرية، بسبب سوء سلوكه وانتشار وقائع غير أخلاقية للاعب.
وأثار القرار جدلاً واسعاً فى الوسط الرياضى خلال الساعات الماضية، كما أعلن الكثيرين تضامنهم مع عمرو وردة حتى عبور هذه الأزمة.
